Èrt - Davò la Bienal de Venezia e la Portrait Gallery de Londra, l’èrt de Gabriele Grones la ruarà ence da l’autra pèrt del oceano. Dal 25 al 27 de otobre defati, l tolarà pèrt a la Bienal de New York, una de le espojizion d’èrt d’aldidancuoi plu cugnisciude e de segur ence chëla plu aldefòra dal conformism. Ideator e diretor de la Bienal l é Pietro Franesi, che La Usc à bele ntervisté davántvia perciéche da temp l colaboreia co nen auter artist ladin, Roland Senoner de Gherdëna, ence dël prejent a New York. Gabriele l portarà n’ opera dal titol “NY Portrait”, fata da 396 pichi retrac de deplù mesure (cm 7x7; cm 14x14; cm 28x28) che rafigureia desvalive persone. I retrac i vignarà tachei auna un al auter a na mòda che da dalonc i se buìsc un ntel auter fin a lascé vedei n autoretrat del autor. L’opera la vignarà metù fora al Time Warner Building. “Coscita descrìf Grones suo nuof laor. “È prové a respone a la domànda: chèl elo l vis de New York? No l é poscibile ciapé fòra mefo n vis per definì la storia e l’anima de na zité, souradut se la zité l’é New York. L’é n simbol de eterogeneité, n luoch ulache se ciapa jent de trope culture e tradizion, e mplù, vigni un l é l resultat de na complicada trama de evenc esperienze e coredo genetich. Per chisc motivi n retrat ideal de New York po’ ester n mescedé plù vis, ulache la relazion nánter i singoi retrać fèsc ntáne e percepì n “retrat global” L mescedòz de retrać ntei ogli de chi che osièrf, l crea l’ impresción de ester davánt a nen sol retrat. Vigni depent pièrt la sua denotazion e l deventa sugestion, per fé ntëne ogni particolar del vis, coscita da compone e creé la trama del New York Portrait.” Per chi che volëssa n savei deplù i po’ vijité l scito internet http://www.nybiennaleart.org. Notizie e su Gabriele Grones se le ciapa sot al link sot “selected emerging artist”.
Fonte: http://www.lauscdiladins.com
